Dersom det nedfelte målet om at alle nye bilar som vert selt i 2025 er utan utslepp, vil trongen for ventilasjon i norske tunnelanlegg gå ned. Det vil kunne merkast godt i det gigantiske Rogfast-sambandet som skal byggast.
Rogfast har ellers vore kritisert for å vere eit så stort prosjekt at det er ei klimabombe i seg sjølv, i tillegg til å vere svært kostbar. Rogfast skal bli verdas lengste og djupaste undersjøiske vegtunnel.
– Regjeringa har ambisiøse klimamål. Vi jobbar for at alle nye bilar som blir selt i 2025 er nullutsleppsfrie. Med dei utsleppsreduksjonane det vil gje, kan Statens vegvesen kutte 300 millionar kroner i utbygginga av ventilasjonsanlegget i den nye Rogfast-tunnelen. Ein meir miljøvenleg kvardag har mange uventa og positive ringverknadar, seier samferdselsminister Knut Arild Hareide i ei melding frå departementet.
I 2019 vart Rogfast-prosjektet stansa. Det viste seg at utbygginga vil koste 24,8 milliardar kroner, ein budsjettsprekk på 6,4 milliardar. Etter det har staten auka sin andel med 3,9 milliardar, ifølgje Veier24.
– Håpar på kutt i andre tunnelar i framtida
Statens vegvesen gjekk gjennom kostnadane i prosjektet E39 Rogfast i Rogaland i fjor. Gjennomgangen som vart gjort i 2020 omfatta også ei ekstern kvalitetssikring.
– Med mindre utslepp frå bilar, treng vi mindre ventilasjon enn tidlegare. Eg vil understreke at sjølv om det blir mindre ventilasjon, går ikkje det utover branntryggleiken i Rogfast. Det er særs viktig for ein så lang tunnel. Samstundes håper vi at reduksjonane i utslepp frå bilane kan føre til kutt i andre tunnelar i framtida, seier samferdselsministeren.
– Kontraktar kan lysast ut
– Vi har no stadfesta overfor Statens vegvesen at dei kan halde fram med bygginga av Rogfast. Etter at Stortinget gjekk med på kostnadsauken, har vi sendt vegvesenet brev for å fullføre den formelle prosessen. Statens vegvesen kan no starte å lyse ut kontraktar i prosjektet, seier Hareide.
Statens vegvesen avlyste den første kontrakten i prosjektet, etter at tilbodet var høgare enn forventa. Sjølv om prosjektet totalt sett har blitt dyrare, har Statens vegvesen kome med ei rekke kutt. Mellom anna kuttet på 300 millionar kroner til ventilasjon.
– Rogfast er eit av dei største samferdselsprosjekta i Noreg. Det bind saman Stavanger-området med Haugalandet, gir ein større bu- og arbeidsmarknadsregion og reduserer reisetida mellom Stavanger og Bergen kraftig. Det er viktig å gjennomføre prosjektet, men vi skal samstundes passe på at kostnadane er under kontroll. Det er dei no, etter ein god gjennomgang av Statens vegvesen, seier Hareide.
