Han står på barrikadane for Førdefjorden, Åsmund Berthelsen. Då Naturpress får tak i han på telefonen har han nett kome heimatt til Naustdal frå Oslo, etter å ha vore til stades på tingrettens fyrste dag i handsaminga av Førdefjord-saka.
(Artikkelen er oppdatert med tilsvar frå Ivar S. Fossum, CEO i Nordic Mining, sjå lenger ned)
Men SVs listetopp og kommunestyremedlem i Sunnfjord kommune deltek også i fysiske naturvernaksjonar ute. Han er motstandar av både sjødeponi i Førdefjorden, men òg gruveverksemda på Engebøfjellet slik Nordic Mining gjer det. Han grunngjev sitt engasjement mellom anna med at naturen systematisk over tid, og historisk sett, nesten alltid har tapt.
– Då må ein etterkvart innsjå at dette går feil veg, og at vi må få slutt på naturtapet. Denne saka er viktig for rettsvernet til naturen, seier Berthelsen.
Med kampen mot sjødeponi i Førdefjorden og gruveanlegg på Engesbøfjellet står naturvernarar i Norge innfor ein ny stor kamp. Denne gongen har dei meir tru på siger enn kanskje nokon gong før, det har til dømes leiar i Naturvernforbundet, Truls Gulowsen, erklært.
Lokal skepsis
Og det kan sjå ut som om folket er på naturvernarane si side, i saka med Førdefjorden.
I ei nasjonal undersøking i 2021 fann Norstat at eit stort fleirtal nordmenn var i mot sjødeponi for gruveavfall, det vere seg i Repparfjorden eller i Førdefjorden. Åsmund Berthelsen kjenner dei lokale tilhøva godt, men vil ikkje seie noko kategorisk om kor mange som er for eller mot verksemda til Nordic Mining i heimkommunen. Men sjødeponi er ikkje populært, det veit han.
– Blant folk flest er det nesten ingen som forsvarar sjødeponi her. I Vevring er det sterk motstand. Eg er litt usikker på stemninga ellers, men i næringslivet er oppdrett, fiske og reiseliv negative. Og når det vert argumentert med arbeidsplassar er motargumentet det same – det kan gå tapt arbeidsplassar òg, dersom det blir full gruvedrift og sjødeponi. Det alle synest vere samde om er at den økologiske tilstanden i sjøen vil gå frå god til dårleg, seier han til Naturpress.
– Og ein del folk verkar å akseptere situasjonen som den er nå, fordi anlegget er så langtkome, legg han til.
Det ligg ein fiskefarm nokså nære området der sjødeponiet er tenkt. For reiselivet er gruvedrift og sjødeponi neppe ei gladsak.
Lite skjønn i vassdirektivet
Åsmund Berthelsen minner om at når konsesjon vart gjeve i 2019 var det med berre ei røyst i overvekt i Sunnfjord kommunestyre. Og vilkåret var full ressursutnytting for å unngå sjødeponi.
– Det det står om i rettssaka er EUs vassdirektiv som i praksis også er norsk lov. Og det står om at det ikkje var på plass ein godkjent avfallshåndteringsplan. Den kom åtte år for seint. Det er sterke krav til bærekraft i EUs direktiv, og det er mykje mindre skjønn enn i norsk lov. Det hjelper ikkje å argumentere med økonomi og næring, det er samla samfunnsnytte som gjeld.
– Driv med grønvasking
Nordic Mining har blitt varsamt behandla lokalt i denne saka, meiner Berthelsen, og siktar til den lokale pressa.
– Linja til avisa Firda verkar å vere å nøye seg med å publisere pressemeldingane som dei har sendt ut, seier han.
Nordic Mining har meir å svare for, ifølgje Berthelsen.
– Nordic Mining driv grønvasking. Dei seier at det vil verte større naturmangfald når dei er ferdige med sitt prosjekt. Utan at dei har dokumentert noko som helst, og heller ikkje sagt korleis dei skal få det til. Vidare seier dei at dei skal greie å redusere avgang/avfall med opp til 70 prosent. Men dette står det ikkje noko om i avfallshandteringsplanen, og det vert heller ikkje stilt konkrete krav i godkjenninga av planen, uttalar Berthelsen.
– Kor stor sjanse trur du det er for at di side vil vinne rettssaka i Oslo tingrett?
– Tradisjonelt har naturen stått veldig svakt ved slike høve, men her meiner eg sjansane burde vere gode, med tanke på at det er EUs vassdirektiv som skal leggast til grunn. Dessutan har advokatane våre i Kluge gjort eit enormt godt arbeid, og dei legg det fram på ein pedagogisk måte. Dei får godt fram kva saka i røynda handlar om, seier Åsmund Berthelsen.
CEO i Nordic Mining, Ivar S. Fossum, har sendt dette tilsvaret til kritikken frå Berthelsen.
– Vi har gjennomført uavhengige studier som analyserer klimautslippet fra vår produksjon sammenlignet med andre, som viser at Engebø kommer best ut av de det er naturlig å sammenligne seg med.
Her er lenke til Nordic Minings beskrivelse (red. anm.)
Med hensyn til naturmangfold så har vi en målsetting om netto forbedring og har derfor utviklet et system for løpende kartlegging av naturmangfold gjennom gruvens levetid.
Vi kjenner ikke kontekst eller bakgrunn for de 70 % i reduksjon som blir nevnt. Snarere tvert imot har vi vært opptatt av å være realistiske mht alternativ utnyttelse av
restmineralene fra produksjonen.
Ulik verkelegheitsoppfatning
Det er staten som er motpart til NU og Naturvernforbundet i Oslo tingrett, ikkje Nordic Mining. Men kan hende er det illustrerande for saka kor ulikt Nordic Mining og naturvernararne omtalar innhaldet i gruveavfallet som gruveselskapet vil pumpe ned i Førdefjorden.
Dette skriv Nordic Mining om gruveavfallet:
«Restmassene fra Engebø-forekomsten består av mineraler som vi typisk finner i norske fjell som granat, pyroksen, kvarts og amfibol. Innhold av tungmetaller er naturlig lavt, på nivå med det som finnes i naturen. Restmassene inneholder lave konsentrasjoner av tilsetningsstoffer.»
Dette skriv Naturvernforbundet om det same avfallet:
«Gruveavfallet vil inneholde store mengder finmalt stein, miljøgifter, mikroplast og giftige kjemikalier som det svært giftige flotasjonsmiddelet SIBX.»
